Psa 110 | XSI | STEP | Maro Yova Kindeni itu ŋgua pa naneŋgu Maro Ŋalae mine tu, “Noko kusaŋona ŋai pa mbauŋgu wia kâ lee, ikura lâ zo ŋinde naŋa ma aonzi noko ne kazâŋa tamâta simo noko kalo.”

Psalms 110

Yova Kindeni ipa ŋgua kuku koipu ŋalae i muŋga ipatea ŋinde

Daviti isia wâŋgiŋa ŋine

1 Maro Yova Kindeni itu ŋgua pa naneŋgu Maro Ŋalae mine tu, “Noko kusaŋona ŋai pa mbauŋgu wia kâ lee, ikura lâ zo ŋinde naŋa ma aonzi noko ne kazâŋa tamâta simo noko kalo.” 2 Maro Yova Kindeni imo Saion lawea, aku io noko tu pwai koipu pa lawea ndoni. Ara, pwai poe kaika panzi ne kazâŋa tamâta. 3 Mao nâ, lâ zo ŋana noko kupara kunzi ne kazâŋa tamâta, ande noko ne tamâta ma ilonzi ara tu simâ pano lâ tuu sapâŋa kulu ŋana sivilano. Noko ma pwai walo kaika ikura zo rârâni, itogo mbo mbo mwâka uru ipâŋga unza tini, kala unza ikai walo wasaseki mine.

4 Maro Yova Kindeni ipambwâre lâ ku iporo mine tu, “Noko koipu ŋalae ma kumo patarawâŋa tamâta mine ku kumo nâ. Noko kumo patarawâŋa tamâta ŋalae, kutogo Melikisede mine.” Yova Kindeni kawa ŋgua rârâni nde mao kanaŋo, aku i ma ilele ne ŋgua ipâŋga kie toŋge tia ndo.

5 Maro Yova Kindeni uru imandi noko tini laiti ŋana ivilano. Mine kala muli, lâ zo ŋana i ne wisi-nâna ma ipâŋga nia yo, ande i ma ipara kunzi koipu ŋalaŋala, ku ma ipolenzi itawanzi ndue ndo lâ. 6 Mao nâ, i ma ipare nia panzi tamâta ŋgu rârâni, ku ma ipunzi tamâta rârâ sipamateteu. I ma itawanzi koipu ŋalaŋala simo tâno ndoni. 7 Koipu Ŋalae ma ilâ pa lââ ŋinde irere nzâla ŋgaŋe, aku ma inu. Mine kala i ma ikai walo, ku ma ipole paraŋa.